Meneja Kampuni ya Olam apolwa Sh47 milioni.

Majambazi wenye silaha juzi mchana walimpora meneja wa Kampuni ya Ununuzi wa Korosho na Ufuta ya Olam, Jafari Mgumba takriban Sh47 milioni.

Katika tukio hilo la kushangaza baada ya kuporwa, meneja huyo alitoweka eneo la tukio na polisi walipofika eneo hilo muda mfupi baadaye walishindwa kuchukua hatua zozote hadi alipokwenda mwenyewe baadaye kuripoti unyang’anyi huo.

Majambazi hao walifanya tukio hilo eneo la Tabata TioT baada ya kumfuatilia kwa nyuma kijana huyo akitokea duka la Quality Plaza alipokwenda kuchukua fedha hizo kutoka Benki ya DTB.

Hata hivyo, baada ya kuporwa fedha hizo, Mgumba alitokomea bila kutoa taarifa polisi, hatua iliyosababisha kuunganishwa na watuhumiwa. Kamanda wa Polisi wa Mkoa wa Ilala, Maria Nzuki alisema mlalamikaji huyo alishikiliwa na kuhojiwa kwa makosa mawili ili kujiridhisha kama anahusika au hahusiki na tukio hilo.

“Alikuja na kujitambulisha kama mfanyabiashara wa kununua mazao ya korosho na ufuta wa Kampuni ya Olam iliyopo Dar es Salaam, lakini ikabidi tumshikilie kwa sababu ya kuchelewa kutoa taarifa polisi pamoja na kutotumia askari kusindikiza fedha hizo, ulinzi ambao hutolewa bure,” alisema.

“Kwa madai yake anasema alipoibiwa akakimbilia ofisini kwao kutoa taarifa halafu ndipo akaja kituoni,” alisema Kamanda Nzuki.

Tukio lilivyotokea

Tukio hilo lilitokea juzi saa 7:00 mchana jirani na Benki ya NMB, Tawi la Mandela Road.

Mwandishi wa habari alifika eneo la tukio na kukuta idadi kubwa ya watu wakiwa na hofu baada ya majambazi hao kufyatua risasi tatu hewani.

Kabla ya majambazi hao kupiga risasi hewani, Mgumba alijaribu kupiga kelele za “wezi, wezi,”, lakini akatishiwa bunduki na kulazimika kunyamaza.

Kutokana na kitendo hicho, watu waliokuwa eneo hilo walitimka kujiokoa na wengine wakilala chini ya vibanda vyao.

Mmoja wa wafanyabiashara katika eneo hilo, aliyejitambulisha kwa jina la Ali alisema risasi zilipigwa baada ya raia huyo kupiga kelele za mwizi.